As embarcacións tradicionais do Arco Artabro, Ortegal e Mariña de Lugo. Exposición premiada co “Antonio Fraguas” do Museo do Pobo Galego...

Nesta exposición analízase o patrimonio cultural enormemente variado e espallado, ligado ao mundo do mar, que ten como fío condutor as augas que abeiran á Galiza e que son un dos seus principais sinais de identidade.

Este patrimonio comprende tanto as embarcacións canto as construcións e o mobiliario sitos na banda costeira e vencellados ao uso e á explotación dos recursos de pesca.

Estas variantes do patrimonio marítimo, foron obxecto de estudo dos alumnos de 2º de bacharelato do IES Concepción Arenal de Ferrol durante 2007 e 2008, so a dirección de Bernardo Máiz Vázquez e Enrique Freire Hermida. Este traballo foi premiado na 5ª edición do Proxecto Didáctico da Fundación Fraguas e o Museo do Pobo Galego e a súa singularidade radica en que se centra en embarcacións propias da Costa da Morte, do Arco Ártabro, do Ortegal e da Costa Cantábrica, pouco destacadas en obras doutros estudiosos.